ABŞ prezidenti Co Bayden və keçmiş dövlət başçısı Donald Tramp təxminən eyni vaxtda Texasın sərhəd şəhərlərinə gəliblər. Bayden Braunsvilldə, Tramp isə İql Passda olub. Ştatın qubernatoru Qreq Ebbot yalnız Donald Trampla görüşüb.

Qaynarinfo "NBC News”a istinadən xəbər verir ki, immiqrasiya hər iki siyasətçinin iştirak etdiyi 2024-cü il prezidentlik yarışının əsas məsələlərindən birinə çevrilib.

Co Bayden və Donald Tramp Texasa yarım saat fərqlə gəliblər. Nəşr qeyd edir ki, Braunsvill və İql Pass arasındakı məsafənin 450 km-dən çox olmasına baxmayaraq, onların çıxışları da zaman baxımından üst-üstə düşüb.

Bayden çıxışında respublikaçıları Trampın partiya yoldaşlarına sənədi qəbul etməməyi tövsiyə etməsindən sonra ABŞ sərhədini qorumaq üçün ikipartiyalı qanun layihəsini imzalamaqdan imtina etdiklərinə görə tənqid edib. "Cənab Trampa demək istədiyim budur: Konqres üzvlərinə bu qanuna mane olmalarını söyləməkdənsə, mənə qoşulun, yoxsa mən Konqresə bu ikitərəfli təhlükəsizlik qanun layihəsinin qəbul edilməsinin zəruriliyini bildirmək üçün sizə qoşulacağam", - ABŞ prezidenti bildirib.

Donald Trampın sözlərinə görə, ABŞ-ın Meksika ilə sərhədini qanunsuz keçən insanlar ölkənin təhlükəsizliyinə böyük təhlükə yaradır. O, miqrasiya böhranını "Bayden işğalı” adlandırıb. "Ölkəmizə gələn insanlar həbsxanalardan gəlirlər, ruhi xəstəxanalardan gəlirlər, dəlixanalardan gəlirlər və terrorçudurlar. Onlar ölkəmizə gətirilir. Bu isə dəhşətlidir”, - Tramp bildirib.

Co Baydenin təklif etdiyi qanun layihəsinə əsasən istənilən bir gündə 5 mindən çox insanın qeyri-qanuni yollarla keçməyə cəhd etdiyi təqdirdə ABŞ-ın Meksika ilə sərhədinin bağlanmasına icazə veriləcək. Respublikaçılar bu həddi çox yüksək hesab edirlər, çünki gündə 5 min qeyri-qanuni immiqrant sərhədi keçərsə, bir il ərzində təxminən 2 milyon insan ABŞ-a qeyri-qanuni daxil olacaq. Bundan əlavə, mühafizəkarlar əmindirlər ki, Co Bayden heç bir qanun layihəsi olmadan fövqəladə vəziyyət elan edə və sərhədi elə indi bağlaya bilər.

Nizami Bağırov