Dünya 14:54 27.02.2024

İsveçin baş naziri Ukraynaya qoşun yeritmək ideyasına münasibət bildirdi

İsveçin baş naziri Ulf Kristersson Fransa prezidenti Emmanuel Makronun Ukraynaya qoşun yeritmə ehtimalı ilə bağlı bəyanatını şərh edib.

Qaynarinfo xəbər verir ki, Dagens portalının məlumatına görə, Kristersson bildirib ki, İsveç hələlik öz qoşunlarını Ukraynaya göndərmək barədə düşünmür.

"İndi bunun heç bir əhəmiyyəti yoxdur”, - o deyib.

O vurğulayıb ki, hər bir ölkənin öz sərhədlərindən kənarda qoşunların yerləşdirilməsi ilə bağlı öz qərarlarını müzakirə etmək hüququ var və bu, bütövlükdə NATO-ya birbaşa təsir etmir.

Kristersson Fransa prezidenti Emmanuel Makronun Rusiyanın müharibədə qalib gəlməsinin qarşısını almaq üçün Fransanın mümkün olan hər şeyi etməyə hazır olduğunu ifadə etdiyini nəzərə alaraq, Ukraynaya qoşun yeridilməsinin mümkünlüyü ilə bağlı Fransanın bəyanatını xüsusi qeyd edib.

Eyni zamanda, o, İsveçin mövqeyinin hərbi fəaliyyətlə bağlı milli qərarların bir təşkilat olaraq NATO-ya təsir etməməsi ilə bağlı olduğunu vurğulayaraq, İsveç və Fransanın siyasi və hərbi strategiyalarını aydın şəkildə fərqləndirib.
Qeyd edək ki, fevralın 26-da Slovakiyanın baş naziri Robert Fiko bildirib ki, Şimali Atlantika Alyansına üzv olan bəzi ölkələr və Avropa İttifaqı öz qoşunlarını Ukraynaya göndərmək imkanını müzakirə edir. 

Avropa liderlərinin Paris görüşündən sonra Fransa prezidenti bildirib ki, gələcəkdə Ukraynaya Qərb qoşunlarının göndərilməsini istisna etmir. Polşa prezidenti Anjey Duda bildirib ki, 28 ölkənin nümayəndələri Parisdə keçirilən görüş zamanı Ukraynaya hərbçilərin göndərilməsi ideyasını müzakirə ediblər, lakin bu məsələdə ortaq mövqe yoxdur.

Alpər