Müasir futbol futbolçuları necə sıradan çıxarır? - "Biz idmançıyıq, maşın deyilik"

Avropanın milli çempionatlarında mövsümün bitməsindən dərhal sonra beynəlxalq oyunlar başlayır. Beynəlxalq Peşəkar Futbolçular Federasiyasının (FIFPRO) yeni araşdırması göstərir ki, oyunların çoxluğu futbolçuların psixi və fiziki sağlamlığına təsir edir. 

10 gündə dörd oyun. Bu, yerli mövsümün gedişində elit bir futbolçu üçün anormal iş yükü deyil. Ancaq iyunun əvvəlində qeyri-adi bir işdir.

Hans Flikin rəhbərlik etdiyi Almaniya milli komandası komandası şənbə günü Boloniyada UEFA Millətlər Liqası çərçivəsində İtaliyaya qarşı oynayır, çərşənbə axşamı İngiltərə ilə matça ev sahibliyi etmək üçün Münhenə dönür, növbəti şənbə günü Macarıstanla oynamaq üçün Budapeştə, çərşənbə axşamı italyanlarla yenidən görüşmək üçün Dortmunda qayıdır. Hans Flik heyətdə müəyyən dəyişikliklər edir, amma uzun məsafələrə səyahət, məşq və psixoloji təzyiq futbolçulara öz mənfi təsirini saxlayır.  

FIFPRO xüsusilə əsas oyunçuların fiziki və əqli sağlamlığını qorumaq üçün bu cür stresslərlə mübarizə aparılmalı olduğunu düşünür. 

FIFPRO-nun Çempionlar Liqasının finalı ərəfəsində yayımlanan son hesabatında qeyd edilib ki, futbolçularım 54%-i təqvimin həddindən artıq yüklənməsi səbəbindən fiziki zədə aldıqlarını, yüksək performans göstərən məşqçilərin 82%-i isə bunların oyunçuların psixi sağlamlığına mənfi təsir göstərdiyini bildirib. Ağır təqvim futbolçularda həmişə ciddi zədələrlə müşayət olunmaya bilər, lakin problemin ciddi olduğu hər kəsə aydındır.

"Oyunçuları həddindən artıq yüklənmədən qorumaq üçün məcburi mexanizmlərin işə salınması çox vacibdir", deyə FIFPRO-nun Baş katibi Yonas Ber-Hoffmann DW-yə bildirib.

"Bu gün oyunların sayı milli komanda futbolçularının psixi və fiziki vəziyyətinə həddindən artıq təzyiq göstərir. Bu, onların meydançadakı performansına təsir edir. Məcburi mexanizmlər təzyiqi azaltmaq üçün yaxşı təhlükəsizlik klapanı təmin edərdi", deyə Baş katib əlavə edib.

COVID-19 pandemiyasının yaratdığı fasilələr səbəbindən problem son bir neçə mövsümdə daha da ağırlaşıb. Noyabr və dekabr aylarında Qətərdəki dünya çempionatı ilə isə vəziyyət daha da kəskinləşəcək.

"Liverpul"un ulduzları Məhəmməd Salah və Sadio Mane üçün Çempionlar Liqasının finalı mövsümün 70-ci matçı olub.

FIFPRO-nun sorğusunda iştirak edən 1055 peşəkar futbolçunun yarısından çoxu onların istirahət müddətlərinin müntəzəm olaraq pozulduğunu hesab edir. Hesabatda qeyd olunur ki, yüksək performanslı məşqçilər mövsümdə maksimum 55 matç keçirilməsini təklif edir. Futbolçuların 87%-i ardıcıl matçların daha az olmasının lazım olduğuna inanır (arada beş gündən az istirahət) və yalnız 22% bu kimi əmək məsələlərinə gəldikdə səslərinin eşidildiyini düşünür. 

Belçika millisinin və "Mançester Siti"nin ulduzu Kevin de Bruyne bu barədə danışarkən "Mənim üçün UEFA Millətlər Liqası əhəmiyyətsiz turnirdir" deyir. 

"Futbolçular olaraq tətil və ya istirahət haqqında danışa bilərik, amma söz haqqımız yoxdur. Biz nə etməli olduğumuza baxırıq, vəssalam. Hər 12 aydan bir 3 həftədən bir qədər çox məzuniyyətimiz var. Kənardakılar bir futbolçunun bir mövsümdən sonra özünü necə hiss etdiyini başa düşmür", deyə Kevin de Bruyne əlavə edib.

O, FIFPRO hesabatında yer alan, Arturo Vidal və Leonardo Bonuççi daxil bir sıra futbolçular tərəfindən imzalanmış açıq mesajı təkrarlayır: "Biz idmançıyıq, maşın deyilik. Bədənimizin və zehnimizin təbii məhdudiyyətləri var. Bizi çox yüklədikcə və ya çox az istirahət etdikcə, sıradan çıxırıq”.

"Mövsümlər arasında düzgün fasilələr vacibdir. Beynəlxalq təqvim uzandıqca və yarışlar çoxaldıqca, futbolçular növbəti oyunlarını oynamaq üçün bir neçə saat qurşağını keçərək yolda əvvəlkindən daha çox vaxt keçirirlər. Belə olmalı deyil", deyə Kevin de Bruyne qeyd edib.

FIFPRO-nun hesabatına görə, uzun səyahət futbolçular üçün başqa bir əhəmiyyətli gərginlikdir. Bəzi oyunçular, xüsusən də Avropa klublarında oynayan Cənubi Amerika və Afrikadan olan futbolçuların bərpa olunmaq üçün daha az vaxtları olduğu halda, bir mövsümdə yüz minlərlə kilometr hava səyahəti edirlər. 

"Bu, göründüyü qədər lüks deyil. Ümumilikdə ictimaiyyət arasında xaricdə oynayan milli komanda futbolçularının böyük əksəriyyətinin həyatının əslində necə olduğu haqqında təhrif olunmuş təsəvvür yaranıb. Biz hamımız bərabər səviyyədə deyilik, baxmayaraq ki, hamımız komandamızın maraqlarını müvafiq federasiyaların maraqları ilə uzlaşdırmaq arzusundayıq. Həqiqətən yüksək səviyyəli bir idmançıya layiq optimal şəraitdə etmədiyim bu səfərlərin getdikcə daha çox tələbkar olan peşənin ayrılmaz hissəsinə çevrilmiş yorğunluğu artırdığını, bədənimizə ağır zərbə vurduğunu və bəzən hətta ən cəsarətlilərimizin də mənəviyyatını sarsıtdığını bilmək vacibdir”, deyə Fransanın "Nansi" klubunda çıxış edən seneqallı Saliou Siss bildirib.